Çfarë është integrimi me Shopify
Shopify e mban dyqanin, por nuk fiskalizon. Në Shqipëri detyrimin e ka biznesi që shet, prandaj çdo porosi duhet të kthehet në faturë të fiskalizuar me NIVF dhe NSLF. Pa një integrim, kjo do të thotë të lexosh porositë një nga një te paneli i Shopify dhe t'i shkruash sërish me dorë, ku numri i porosisë dhe numri i faturës largohen nga njëri-tjetri sa herë dikush nxiton.
Integrimi e mbyll këtë punë. Instalohet një herë te dyqani juaj dhe që nga ai moment çdo porosi vjen te fature.al, bëhet faturë e llojit të duhur dhe fiskalizohet brenda pak sekondash. Fatura duket njësoj si çdo faturë tjetër e biznesit tuaj, hyn te raportet dhe te libri i shitjeve, dhe zbret nga magazina si çdo shitje.
Si lidhet dyqani
Lidhja bëhet një herë dhe zgjat pak minuta. Instaloni aplikacionin tonë te dyqani juaj Shopify dhe aprovoni aksesin, pastaj ktheheni te fature.al ku plotësoni tre gjëra:
- Vendin e ushtrimit të veprimtarisë nën të cilin lëshohet fatura. Duhet të ketë një pajisje fiskale, sepse shitja online me kartë është shitje me para në dorë.
- Klientin e parazgjedhur, tek i cili faturohen blerësit që nuk japin NIPT.
- Momentin kur lëshohet fatura dhe nëse fiskalizimi bëhet vetvetiu apo pas kontrollit tuaj.
Nëse e lini konfigurimin përgjysmë, porositë vazhdojnë të regjistrohen pa u faturuar dhe ktheheni ta mbyllni kur të doni. Asnjë porosi nuk humbet ndërkohë. Të njëjtat rregulla vlejnë për disa dyqane njëherësh: çdo dyqan Shopify lidhet me vendin e vet të ushtrimit.
Cila faturë lëshohet
Në fiskalizim ndarja nuk bëhet sipas kartëmonedhave, por sipas mënyrës së pagesës. Pagesa me kartë është shitje me para në dorë dhe numërohet sipas pajisjes fiskale, ndërsa transferta bankare është shitje pa para në dorë. Blerësi e vendos pjesën tjetër: kur jep NIPT, fatura i lëshohet biznesit të tij.
| Blerësi | Pagesa | Fatura |
|---|---|---|
| Konsumator pa NIPT | Kartë, kupon ose para në dorëzim | Faturë me para në dorë, sipas TCR-së |
| Konsumator pa NIPT | Transfertë bankare | Faturë pa para në dorë |
| Biznes me NIPT | Kartë ose para në dorëzim | Faturë me para në dorë, me NIPT-in e blerësit |
| Biznes me NIPT | Transfertë bankare | Faturë elektronike |
NIPT-i i blerësit lexohet nga fushat shtesë të arkës, pa u kërkuar asgjë e veçantë prej jush. Dyqani online, nga ana e vet, deklarohet si vend i ushtrimit të veprimtarisë me llojin e tregtisë online dhe lidhet me pajisjen fiskale që i përket.
Kur lëshohet fatura
Momenti i faturimit zgjidhet nga ju, sepse dyqanet nuk shesin njësoj:
- Kur pagesa konfirmohet. Parazgjedhja dhe zgjedhja e sigurt. Fatura del kur Shopify thotë se paratë kanë hyrë.
- Kur porosia niset për dorëzim. Për pagesat në dorëzim, ku korrieri i derdh paratë ditë më vonë.
- Kur porosia krijohet. Vetëm për dyqanet që faturojnë me porosinë dhe nuk punojnë me pagesa në dorëzim.
Krahas kësaj, fiskalizimi automatik mund të fiket. Atëherë çdo porosi ruhet si faturë draft: e shikoni, e ndreqni nëse duhet dhe e fiskalizoni vetë. Shumë dyqane e mbajnë të fikur javën e parë dhe e ndezin sapo shohin se faturat dalin ashtu si i presin.
Tabela e porosive
Një ekran i dedikuar tregon çdo porosi që ka ardhur, me numrin e porosisë, blerësin, pagesën, totalin dhe gjendjen: në pritje, e bllokuar, e faturuar, e fiskalizuar, e dështuar ose e shënuar si porosi që nuk faturohet. Nga rreshti hapni faturën përkatëse, dhe te fatura shihni porosinë nga e cila lindi. Filtroni sipas datës, gjendjes dhe dyqanit kur keni më shumë se një.
Dy raste bllokohen me qëllim, sepse janë të vërteta por të dyshimta. Kur totali i porosisë nuk përputhet me shumën e rreshtave, dhe kur një shitje brenda vendit vjen pa TVSH, që zakonisht do të thotë se taksat në dyqan nuk janë konfiguruar. Në të dyja rastet fatura pret të shohë një sy njeriu në vend që të shkojë e pakontrolluar te administrata tatimore.
Shitjet e bëra me Shopify POS nuk faturohen sërish. Ato janë shitje në dyqan fizik që arka i ka fiskalizuar tashmë, dhe një faturë e dytë do të ishte më e vështirë për t'u ndrequr sesa një faturë që mungon.
Kthimet dhe anulimet
Kur kthehet malli, rimbursimi në Shopify kthehet vetvetiu në faturë korrigjuese, të plotë ose të pjesshme sipas shumës që u kthye. Fatura e parë nuk fshihet dhe nuk ndryshohet, sepse ajo ka shkuar tashmë te administrata tatimore. Nëse ndonjë rregull fiskal nuk e lejon korrigjimin, arsyeja shkruhet te porosia dhe asgjë nuk detyrohet të kalojë.
Monedha dhe TVSH
Shumat merren ashtu si i arkëton biznesi, jo ashtu si i sheh blerësi pas konvertimit të ekranit. TVSH-ja lexohet nga vetë porosia dhe nuk hamendësohet, kështu që një dyqan që i shfaq çmimet me TVSH të përfshirë dhe një dyqan që i shfaq pa të, të dy dalin me faturë të saktë. Shitjet në monedhë të huaj e ruajnë monedhën e porosisë, ndërsa transporti hyn si rresht më vete kur ka kosto.
Porositë nuk numërohen dy herë edhe nëse Shopify e dërgon të njëjtin njoftim disa herë, dhe ato që nuk kalojnë herën e parë riprovohen vetvetiu. Një kontroll i rregullt krahason porositë e dyqanit me ato që kemi marrë, që asnjë të mos mbetet jashtë kur interneti ose portali i fiskalizimit bien për pak kohë.
Pyetje të shpeshta
A më duhet pajisje fiskale për dyqanin online?
Po, nëse pranoni pagesa me kartë ose para në dorëzim. Në fiskalizim pagesa me kartë është shitje me para në dorë, dhe faturat me para në dorë numërohen sipas pajisjes fiskale (TCR). Nëse shitni vetëm me transfertë bankare, fatura është pa para në dorë dhe numërohet në nivel biznesi.
A duhet ta regjistroj dyqanin online si vend ushtrimi veprimtarie?
Po. Tregtia online është lloj më vete i vendit të ushtrimit të veprimtarisë dhe deklarohet në platformën Self-Care me kodin e vet. Në fature.al dyqani Shopify lidhet pikërisht me atë vend ushtrimi dhe me pajisjen fiskale që i përket.
Po kur blerësi jep NIPT-in?
Fatura i lëshohet biznesit dhe jo klientit të parazgjedhur. NIPT-i lexohet nga fushat shtesë të arkës, dhe nëse pagesa është me transfertë bankare, fatura del si faturë elektronike.
A mund ta kontrolloj faturën para se të fiskalizohet?
Po. Fikni fiskalizimin automatik dhe çdo porosi ruhet si faturë draft. E shihni, e ndreqni nëse duhet, dhe e fiskalizoni vetë kur të jeni gati.
Çfarë ndodh me shitjet e bëra nga Shopify POS?
Nuk faturohen sërish. Ato janë shitje në dyqan fizik që arka i ka fiskalizuar tashmë, prandaj shënohen si porosi që nuk faturohet dhe nuk dërgohen dy herë te administrata tatimore.
Po kthimi i mallit nga blerësi?
Rimbursimi në Shopify kthehet në faturë korrigjuese, të plotë ose të pjesshme sipas shumës së kthyer. Fatura e fiskalizuar nuk fshihet dhe nuk ndryshohet, sepse ajo ka shkuar tashmë te administrata tatimore.
Çmimi
Integrimi me Shopify është modul shtesë që aktivizohet sipas abonimit tuaj. Na kontaktoni për ta shtuar te paketa juaj. Nëse shisni edhe me dërgesa, shihni gjithashtu integrimin me Wolt, që punon me të njëjtën logjikë.